Punëtorët në Kosovë vazhdojnë të pësojnë, duke humbur edhe jetën. Një rast i vdekjes ndodhi vetëm dy ditë më parë në Ferizaj, kur një punëtor ra nga lartësia ku punonte. Tani një tjetër ka rënë nga platoja e një objekti në Gjilan dhe në gjendje të rendë është dërguar për trajtim në QKUK.
Në një njoftim që ka lëshuar sot policia thuhet se një punëtor ka rënë nga platoja e objektit ku po punonte të mërkurën në Gjilan.
Ai raportohet se është në gjendje të rëndë dhe është dërguar në QKUK për trajtim.
Njësitet policore po e hetojnë rastin.
“Është raportuar se viktima mashkull kosovar derisa kishte qenë duke punuar në një objekt kishte rënë nga platoja dhe si pasojë kishte pësuar lëndime. Viktima pas marrjes së ndihmës së parë në gjendje kome është dërguar në QKUK Prishtinë për tretman mjekësor. Njësitë relevante policore kanë dalë në vendin e ngjarjes, është njoftuar prokurori udhëzon që rasti të vazhdoj në procedurë hetimore”, thuhet në raportin 24-orësh të PK-së.
Kujtojmë se vetëm dy ditë më parë një tjetër punëtor humbi jetën në Ferizaj, pasi ra nga lartësia ku punonte.
“Raportohet se viktima mashkull kosovar derisa ka qenë në vendin e punës , në rrethana të panjohura ka rënë nga një lartësi. Viktima është dërguar për tretman ku mjeku ka konstatuar vdekjen e viktimës. Në vendin e ngjarjes kanë dalë njësitet përkatëse policore. Me vendim të prokurorit trupi i pa jetë i viktimës dërgohet në IML për obduksion”, thuhet në raport.
Ky rast është cilësuar si “Asgjësim dëmtim ose heqje e pajisjeve mbrojtëse”.