Instituti Kombëtar i Shëndetësisë Publike të Kosovës (IKShPK) ka publikuar një listë të detajuar me këshilla dhe rekomandime për mbrojtje nga temperaturat e larta që kanë përfshirë vendin këto ditë.
Sipas IKShPK-së, vala e të nxehtit po paraqet rrezik serioz për shëndetin e qytetarëve, sidomos për grupet më të ndjeshme si të moshuarit, personat me sëmundje kronike dhe fëmijët. Temperatura të larta gjatë ditës dhe natës mund të shkaktojnë rraskapitje, goditje nga nxehtësia dhe përkeqësim të gjendjes shëndetësore, veçanërisht tek ata me sëmundje kardiovaskulare, mendore, respiratore apo diabet.
📌 Rekomandimet e IKShPK-së për mbrojtje nga të nxehtit përfshijnë:
✅ Qëndroni larg të nxehtit
- Shmangni daljet dhe aktivitetet fizike gjatë orëve më të nxehta (10:00–17:00).
- Qëndroni në ambiente të freskëta apo në hije.
- Informohuni rregullisht për paralajmërimet zyrtare mbi temperaturat ekstreme.
✅ Mbani shtëpinë të freskët
- Hapni dritaret gjatë natës dhe mbyllini gjatë ditës.
- Mbuloni dritaret me perde ose materiale reflektuese.
- Fikni pajisjet elektrike kur nuk janë të nevojshme.
- Përdorni ventilatorë vetëm kur temperatura është nën 40°C.
- Përdorni kondicioner në 27°C në kombinim me ventilator për kursim të energjisë.
✅ Freskoni trupin dhe hidratojeni
- Vishuni me rroba të lehta dhe pambuku.
- Pini ujë rregullisht – së paku një gotë në orë dhe 2–3 litra në ditë.
- Përdorni metoda të freskimit si dush, leckë të lagur, apo spërkatje.
- Kujdesuni për personat e pambrojtur dhe ata që jetojnë vetëm.
✅ Mbroni fëmijët dhe foshnjat
- Mos i lini fëmijët ose kafshët brenda veturave të parkuara.
- Mos i ekspozoni fëmijët në diell gjatë mesditës.
- Vishini me rroba të lehta dhe përdorni krem mbrojtës, kapele dhe syze dielli.
- Mos mbuloni karrocën me pëlhurë të thatë – preferoni një pëlhurë të lagur dhe të ajrosur.
IKShPK bën thirrje për zbatim të këtyre udhëzimeve si në nivel individual, ashtu edhe në nivel komunitar e institucional, me qëllim parandalimin e pasojave serioze shëndetësore që mund të shkaktojë kjo valë e të nxehtit.
