Programi i Kombeve të Bashkuara për Zhvillim (UNDP) në Kosovë, në bashkëpunim me Ministrinë e Administrimit të Pushtetit Lokal dhe RIT Kosovë, me mbështetjen financiare të Ministrisë së Punëve të Jashtme dhe Bashkëpunimit Ndërkombëtar të Republikës së Italisë, shpalli thirrjen për aplikime në kuadër të Aftësitë Digjitale për të Gjithë (DS4A).
Iniciativa e cila është pjesë e Projektit të UNDP-së për Aftësitë Digjitale shfrytëzon potencialin e sektorit privat dhe rrit aftësitë e Teknologjisë së Komunikimit të Informacionit (TIK) tek të rinjtë në Kosovë. Projekti do të mbështesë deri në 180 gra dhe burra të rinj të moshës 18-29 vjeç, të cilët kërkojnë të përmirësojnë dhe rikualifikojnë aftësitë e tyre përmes kurseve praktike në DS4A.
Nisma do të mbështesë të rinjtë dhe të rejat në zhvillimin e aftësive digjitale të përshtatshme për treg falë trajnimeve (bootcamps) intensive në: Aplikacion mobil, Zhvillim të Uebit, Inxhinieri e të Dhënave, Rrjete, Marketing Digjital dhe Dizajn Digjital. Bootcamps të TIK-ut janë programe trajnimi intensive dhe afatshkurtra që synojnë t’u ofrojnë pjesëmarrësve aftësi digjitale që i përgatisin ata për punësim në pozicione teknologjike të nivelit fillestar brenda sektorit privat.
Të rinjtë dhe të rejat që aspirojnë të zgjerojnë ekspertizën e tyre digjitale, veçanërisht me prejardhje nga komunitetet jo-shumicë, inkurajohen të paraqesin aplikimet e tyre deri më 24 prill 2023.
Rreth Projektit të UNDP-së për Aftësitë Digjitale në Kosovë
Projekti bazohet në potencialin e ekonomisë digjitale për të ofruar mundësi punësimi dhe për të kontribuar në rritjen ekonomike për përmirësimin e jetesës për të rinjtë. Në veçanti, ndërhyrja ofron mundësi për zhvillimin e aftësive si një mundësi kyçe për të rritur punësueshmërinë si për zhvillim të qëndrueshëm ashtu edhe për kohezion social, duke synuar grupe specifike të popullsisë. Projekti synon të kapërcejë hendekun midis grupit të synuar të popullsisë dhe nevojave të tregut të ekonomisë digjitale për sa i përket aftësive, si një mjet për krijimin e punësimit dhe rritjes ekonomike, duke rritur njëkohësisht dialogun dhe mirëkuptimin ndëretnik.
Për të aplikuar, klikoni në këtë LINK
