Administrata e presidentit amerikan Donald Trump ka nisur një operacion të ri kundër emigrantëve pa dokumente në New Orleans, konfirmuan të mërkurën zyrtarë federalë, duke e bërë qytetin më të fundit që përfshihet në fushatën e gjerë të goditjes ndaj emigracionit të paligjshëm.
Sipas Departamentit të Sigurisë Kombëtare të SHBA-së, operacioni synon arrestimin e personave me precedentë penalë të cilët janë liruar nga paraburgimi lokal për shkak të politikave të qytetit që kufizojnë bashkëpunimin me autoritetet federale të emigracionit.
Trump ka urdhëruar zhvillimin e operacioneve të ngjashme në qytete të drejtuara nga demokratët në të gjithë vendin, përfshirë Los Angeles, Chicago dhe Washington D.C., me synimin për të rritur nivelin e deportimeve.
Banorët dhe zyrtarët lokalë në qytetet e shënjestruara kanë reaguar duke thënë se këto operacione shpesh kanë kapur persona pa të shkuar kriminale dhe kanë përdorur metoda të ashpra që rrezikojnë sigurinë e komuniteteve.
Edhe në New Orleans, shumë banorë janë alarmuar se mund të bëhen objekt i profilizimit dhe ndalimeve arbitrare. Në një restorant familjar, një grua përgatiti shtretër provizorë që familjarët të flenin aty, për të shmangur udhëtimet mes shtëpisë dhe punës dhe ekspozimin ndaj patrullave federale.
Operacioni në New Orleans pritet të zgjasë deri në fund të vitit, por përmasa e tij mbetet e paqartë. Trump deklaroi gjatë një takimi të kabinetit se Garda Kombëtare do të dislokohet në qytet brenda disa javësh.
