Tre persona janë arrestuar në Shtime në orët e vona të mbrëmjes së të mërkurës pasi e kanë rrahur dhe i kanë shkaktuar lëndime trupore një 25-vjeçari, raporton KosovaNews.
Policia e stacionit në Shtime, tregon se dje rreth orës 18:50 ka pranuar një informacion se në rrugën “Anton Çetta” në Shtime është një rast i lëndimit trupor, ku një person D. A (25 vjeçar) kishte pësuar lëndime trupore nga sulmet fizike, nga tre persona të cilët më pas ishin larguar nga vendi i ngjarjes.
Në njoftim thuhet se i lënduari D.A për ndihmë mjekësore është dërguar fillimisht në Qendrën e Mjekësisë Familjare në Shtime e më pas për tretman të mëtutjeshëm mjekësor është dërguar në Qendrën Emergjente në Ferizaj.
Në lidhje me këtë ngjarje, policia e rendit e më pas edhe hetuesit e stacionit të policisë në Shtime i kanë marrë veprimet e nevojshme dhe nën autorizim të Prokurorit kujdestar nga Prokuroria Themelore në Ferizaj i kanë nisur hetimet.
“Pas një pune hetimore intensive në terren, rreth orës 22:00 hetuesit policor kanë arritur të identifikojnë personat e dyshuar, vendin e ndodhjes së tyre dhe t’i arrestojë tre të dyshuarit të përfshirë në këtë rast”, thuhet nga Policia.
Bëhet e ditur se të dyshuarit janë shoqëruar në stacionin e policisë në Shtime dhe pas intervistimit nga policët hetues, me vendim të Prokurorit të rastit, personat: N.A (M/K) i moshës 44 vjeçar, A.A (M/K) i moshës 23 vjeçar dhe A.A (M/K) i moshës 21 vjeçar janë në dërguar në mbajtje për 48 orë , për procedura të mëtejme hetimore, ndërsa rasti është cilësuar “Lëndim i lehtë trupor”./KosovaNews/
