Policia e Kosovës, përmes Drejtorisë për Hetimin e Krimeve Ekonomike dhe Korrupsionit (DHKEK), Njësia Rajonale në Gjakovë, ka arrestuar tre inspektorë të Administratës Tatimore të Kosovës (ATK), të dyshuar për marrje ryshfeti.
Kosovanews mëson se të arrestuarit janë Afrim Gjokaj, Dukagjin Nika dhe Elhami Qorkadiu, të gjithë punonjës të ATK-së. Sipas informacioneve të siguruara, të arrestuarit kanë lidhje me Partinë Demokratike të Kosovës (PDK).
Në disa fotografi të siguruara nga Kosovanews, Afrim Gjokaj, inspektor në ATK, shihet në një fotografi me ish-ministrin Blerand Stavileci, si dhe me figura të tjera të njohura të PDK-së, si Xhavit Haliti, Adem Grabovci dhe Sami Lushtaku, të cilët janë të lidhur ngushtë me këtë parti.
Ndërkohë, Dukagjin Nika, i arrestuar gjithashtu, shfaqet duke drekuar me një qingj përpara me deputetin e PDK-së, Hysen Berisha.
Po ashtu, Elhami Qorkadiu, një tjetër inspektor i arrestuar, shihet në një fotografi me nënkryetarin e PDK-së Enver Hoxhaj
Policia njofton se, me urdhër të Gjykatës Themelore në Gjakovë dhe në koordinim me prokurorin përgjegjës të rastit, janë kryer kontrollime në tri objekte banimi të personave të dyshuar – dy në Gjakovë dhe një në Pejë, ku janë siguruar prova materiale që lidhen me hetimin.
