Presidenti i Shoqatës së Miqësisë Kosovë – Austri, avokati Arsim Vranovci, ka reaguar me shqetësim dhe dhimbje të thellë ndaj ngjarjes tragjike që ndodhi në një shkollë të mesme në Graz të Austrisë, ku disa nxënës humbën jetën pas një sulmi me armë zjarri të kryer nga një bashkëmoshatar i tyre.
“Lajmi për këtë akt të rëndë na ka tronditur thellë. Në emër tim personal si president i Shoqatës së Miqësisë Kosovë – Austri dhe në emër të gjithë anëtarëve të bordit të shoqatës, u shprehim ngushëllimet më të sinqerta familjeve të viktimave, Ambasadës së Austrisë në Prishtinë dhe të gjithë popullit austriak”, deklaroi Vranovci.
Ai shtoi se dhimbja për këtë ngjarje nuk njeh kufij dhe se miqësia mes popujve tanë forcohet edhe më shumë përmes solidaritetit në momente të tilla të vështira.
“Lutemi dhe shpresojmë që kjo tragjedi të jetë rasti i fundit në botë. Askush nuk duhet të përjetojë dhimbje të tillë në vendin më të shenjtë për të rinjtë – në shkollë”, theksoi më tej Vranovci.
Shoqata e Miqësisë Kosovë – Austri do të vazhdojë të qëndrojë pranë institucioneve austriake dhe qytetarëve të këtij vendi mik në përpjekjet për parandalimin e ngjarjeve të tilla dhe për ruajtjen e vlerave të paqes dhe bashkëjetesës.
