Një ngjarje e rëndë ka tronditur qendrën luksoze të skijimit Crans-Montana, në jugperëndim të Zvicrës. Një shpërthim i fuqishëm ka ndodhur në orët e para të mëngjesit të së enjtes në një bar të zonës, duke shkaktuar humbje të shumta njerëzore dhe dhjetëra të plagosur, transmeton KosovaNews.
Sipas Policisë së Zvicrës, shpërthimi ka ndodhur në katin nëntokësor të barit, në një kohë kur brenda ambientit ndodheshin mbi 100 persona, ndonëse kapaciteti i lokalit ishte deri në 400 persona. Zëdhënësi i policisë, Gaetan Lathion, ka deklaruar për agjencinë AFP se burimi i shpërthimit ende nuk dihet dhe se ka shumë viktima e të plagosur.
“Ka ndodhur një shpërthim, burimi i të cilit ende nuk dihet. Kemi shumë të vdekur dhe të plagosur”, ka thënë Lathion.
Autoritetet zvicerane ende nuk kanë publikuar shifra zyrtare për numrin e viktimave. Megjithatë, mediat lokale raportojnë se numri i të vdekurve mund të jetë mbi 20 persona, ndërsa disa burime jozyrtare flasin për deri në 40 viktima.
Pas ngjarjes, autoritetet kanë ndërmarrë masa të menjëhershme sigurie dhe shpëtimi. Në zonën e prekur është vendosur ndalim i përkohshëm i fluturimeve, ndërsa në vendngjarje janë angazhuar forca të shumta të policisë, zjarrfikësve dhe ekipeve emergjente, si dhe disa helikopterë për evakuimin e të plagosurve. Po ashtu, është hapur një linjë telefonike ndihmëse për familjarët që kërkojnë informacion mbi të afërmit e tyre.
Shkaku i shpërthimit mbetet ende i paqartë. Sipas raportimeve të para nga radiot lokale, dyshohet se incidenti mund të jetë shkaktuar nga përdorimi i fishekzjarrëve brenda ambientit të mbyllur. Policia ka theksuar se hetimet janë në fazë të hershme dhe se po shqyrtohen të gjitha pistat për zbardhjen e plotë të rrethanave të kësaj ngjarjeje tragjike.
