Tre persona kanë mbetur të plagosur mëngjesin e sotëm në lagjen Veternik.
Policia ka bërë të ditur se të njëjtit fillimisht ishin përfshirë në një rrahje me disa persona të tjerë, ku pastaj u përdorën edhe armët.
Si pasojë e kësaj të plagosur kanë mbetur dy vajza dhe një djalë.
Të njëjtit janë dërguar për tretman mjekësor në Qendrën Klinike Universitare të Kosovës, dhe gjendja e tyre është stabile.
Drejtori i Emergjencës në QKUK, Naser Syla tha për Telegrafin se janë në përfundim të konsultimeve të nevojshme dhe se të njëjtit do të lëshohen pastaj në shtëpi.
“Po i kemi pranuar në Emergjencë, janë kryer të gjitha ekzaminimet e nevojshme dhe gjendja e tyre është stabile. Jemi duke i përfunduar konsultimet e nevojshme dhe pas tyre do të lëshohen në shtëpi”, ka thënë Syla.
