Stuhitë e fuqishme vranë të paktën nëntë njerëz dhe lanë një gjurmë të gjerë shkatërrimi të dielën në Teksas, Oklahoma dhe Arkansas, gjatë motit të fundit vdekjeprurës që ka goditur një pjesë të SHBA-së.
Sipas mediave të huaja, pesë nga vdekjet ishin në Teksas, pranë kufirit të Oklahomas, ku një tornado natën e së shtunës përfshiu një zonë rurale pranë një parku shtëpish, thanë zyrtarët.
Stuhitë shkaktuan dëme edhe në Oklahoma, ku u lënduan të ftuarit në një dasmë në natyrë.
Dhjetëra mijëra banorë ishin pa energji në të gjithë rajonin.
“Ka mbetur vetëm një gjurmë mbeturinash. Shkatërrimi është goxha i rëndë”, tha për Associated Press sherifi i qarkut Cooke Ray Sappington.
Zyrtarët thanë se shumë njerëz u transportuan në spitale me ambulancë dhe helikopter, por ata nuk e dinin menjëherë shkallën e plotë të lëndimeve.
Sappington tha se të vdekurit në Teksas përfshinin tre anëtarë të familjes që u gjetën në një shtëpi pranë komunitetit të vogël të Valley View.
Ndërkohë të paktën dy persona u raportuan të vrarë në Arkansas, duke përfshirë një grua 26-vjeçare e cila u gjet e vdekur jashtë një shtëpie të shkatërruar në Olvey, një komunitet i vogël në Boone County, sipas Daniel Bolen, nga Zyra e Menaxhimit të Emergjencave të qarkut.
Një person tjetër vdiq në Benton County, Arkansas.
Melody Kwok, një drejtore e komunikimit në qark, tha se shumë njerëz të tjerë u plagosën dhe se punonjësit e urgjencës po u përgjigjeshin ende thirrjeve.
Zyrtarët konfirmuan gjithashtu dy vdekje në Mayes County, Oklahoma.
