Me kërkesën e Komunës së Mitrovicës së Veriut, Policia e Kosovës ka asistuar sot për lirimin e disa pronave në veri. Bastisjet janë bërë në një objekt banesor, derisa gjatë bastisjes janë hasur në disa struktura paralele.
Ministri i Brendshëm Xhelal Sveçla ka dhënë detaje lidhur me aksionin e realizuar mëngjesin e sotëm. Ai ka thënë se sot është mbyllur edhe një institucion paralel i Serbisë në Mitrovicë të Veriut.
Ndërsa ka pohuar se sipas materialeve të siguruara nga policia, bëhet fjalë për një institucion i cili jashtëligjshëm ka grumbulluar pagesa nga qytetarët dhe bizneset e shumta, për shfrytëzimin e objekteve që janë kinse nën menaxhimin e tyre.
“Në respektim të plotë të legjislacionit tonë, në kuadër të bashkëpunimit ndërinstitucional dhe të përpjekjeve të përbashkëta në luftim të çdo ilegaliteti brenda vendit tonë, sot është mbyllur edhe një institucion paralel i Serbisë në Mitrovicë të Veriut. Sipas materialeve të siguruara nga Policia jonë, bëhet fjalë për një institucion i cili jashtëligjshëm ka grumbulluar pagesa nga qytetarët dhe bizneset e shumta për shfrytëzimin e objekteve që janë kinse nën menaxhimin e tyre. Ky keqpërdorim i realizuar nën flamujt e emblemat e Serbisë përveç që është mbyllur sot, do të hetohet deri në fund”, ka thënë Sveçla.
