Edicioni i ri i elitës së basketbollit kosovar ka nisur të shtunën dhe me befasi.
Vëllaznimi i Gjakovës të shtunën në palestrën “Shani Nushi” fitoi ndaj Pejës.
“Kuqezinjtë” fituan me rezultatin 73:65 ndaj pejanëve në nisje të kampanjës së re dhe vendimtare ishte periudha e dytë.
Peja fitoi 17:13 në çerekun e parë, ndërsa në çerekun e dytë, Vëllaznimi u kthye fuqishëm duke e fituar dhjetëminutëshin me shifrat 31:20, për të shkuar në pushim me shtatë pikë epërsi, 44:37.
Në fund të çerekut të tretë, Vëllaznimi shkoi deri në 12 pikë dallim ndaj Pejës dhe nuk lejoi befasi deri në fund të ballafaqimit.
Çerekun e tretë, vendësit e fituan me rezultatin 15:13, ndërsa në periudhën e fundit humbën 15:14, por kjo nuk e vuri në rrezik fitoren.
Qendra nigeriane i gjatë 210 centimetra, Jason Jitoboh, ishte më i dalluari në fitore me dyshifror të dyfishtë prej 13 pikëve e 13 kërcimeve. Ai shtoi edhe dy asistime.
Kontribut dhanë edhe Shizz Alston dhe Trey Anderson. Alston pati 28 pikë, katër kërcime e dy asistime, kurse Anderson shënoi 13 pikë, shtatë kërcime e dy asistime.
Kapiteni Atik Koshi pati tetë pikë.
Pejës nuk i ndihmuan 18 pikët, gjashtë kërcimet e katër asistimet e Shahade Wellsit.
