Kompania “British American Tobacco” do të paguajë 635 milionë dollarë plus interesat autoriteteve amerikane pasi pranoi se i kishte shitur cigare Koresë së Veriut, duke shkelur sanksionet.
Autoritetet amerikane deklaruan se gjoba lidhet me aktivitetin e grupit britaniko-amerikan në vendin aziatik mes viteve 2007-2017.
Drejtuesi i “British American Tobacco”, Jack Bowles deklaroi se ndihej i keqardhur për veprimet e kompanisë.
Shtetet e Bashkuara kanë vendosur sanksione të ashpra ndaj Koresë së Veriut për shkak të aktiviteteve të saj bërthamore.
Marrëveshja për pagesën u arrit mes gjigantit të duhanit dhe Departamentit amerikan të Drejtësisë dhe atij të Thesarit.
“British American Tobacco”, e njohur shkurt si “BAT”, është një nga kompanitë shumëkombëshe më të mëdha në botë dhe një nga 10 kompanitë më të mëdha të Britanisë.
Ajo zotëron marka të tjera të njohura si “Lucky Strike” dhe “Dunhill”.
Departamenti amerikan i Drejtësisë deklaroi se “BAT” kishte komplotuar gjithashtu për të mashtruar institucionet financiare.
Lideri koreano-verior Kim Jong Un njihet për konsumin e duhanit. Vitin e kaluar, Shtetet e Bashkuara u përpoqën të ndalonin eksportet e duhanit në vendin e izoluar aziatik, por nisma u pengua nga Rusia dhe Kina, që vendosë veton.
