Real Madridi i ka kërkuar gjykatës që hetimi për rastin Negreira të zgjatet edhe për gjashtë muaj të tjerë.
Në vitin 2023, Barcelona dhe drejtuesit e saj u akuzuan për ryshfet në lidhje me pagesat e bëra ndaj ish-nënkryetarit të Komitetit Teknik të Gjyqtarëve (CTA), Jose Maria Enriquez Negreira, i cili në atë kohë ishte në shërbim të Federatës Mbretërore Spanjolle të Futbollit (RFEF).
Gjykata i cilësoi pagesat e Barcelonës – rreth 7.7 milionë euro midis viteve 2001 dhe 2018 – si vepër penale.
Sipas Marca-s, ekipi ligjor i Realit i ka kërkuar gjykatës që të zgjasë hetimet nga 1 shtatori 2025 deri në mars 2026, në mënyrë që të sqarohen plotësisht të gjitha rrethanat që lidhen me pagesat ndaj kompanisë së lidhur me Enriquez Negreiran.
Barcelona, nga ana e saj, ka mohuar çdo keq bërje, duke pretenduar se pagesat ishin për konsulencë teknike dhe analiza të gjyqtarëve, pa ndikim në vendimet arbitrale.
Klubi ka deklaruar se nuk ka prova që lidhin këto pagesa me manipulim të ndeshjeve apo favorizim sportiv.
Rasti Negreira ka shkaktuar jehonë të madhe në opinionin publik dhe sportiv në Spanjë, duke hedhur dyshime mbi integritetin e garave gjatë dekadës së fundit.
Zgjatja e hetimeve kërkuar nga Real Madridi sinjalizon se procesi mund të zgjatet më tej për të zbardhur plotësisht skandalin.
