Një javë më parë KosovaNews raportoi se ka disa muaj që ka filluar të bëhet një mbindërtim në njërën nga ndërtesat në kompleksin e banesave të “Ballkanit” në qytetin e Suharekës.
Një banorë i këtij kompleksi, i cili deshi të mbetej anonim, pati deklaruar për Kosovanews se në këtë mbindërtim zakonisht punohet në ditët e vikendit me qellim që të mos vërehen nga inspektorët dhe punimet vazhdojnë pa u penguar nga askush.
Lidhur me këtë, është kontaktuar Drejtoresha e Inspekcionit, Albulena Kokollari, megjithëse nuk ka dhënë shumë detaje për këtë rast, ajo tha se kjo drejtori ka marrë masat dhe janë duke i ndjekur procedurat konform me ligjin dhe rregulloret në fuqi.
“ju njoftoj që Drejtoria e Inspekcionit i ka marrë masat e duhura dhe është duke i ndjekur procedurat konform me ligjin dhe rregulloret ne fuqi.”, deklaroi Kokollari.
Sipas burimeve të KosovaNews, pronari i cili ka bërë mbindërtimin, është pajtuar se do ta rrënojë vet atë.
Theksojmë se edhe në ndërtesat tjera të këtij kompleksi vërehen mbindërtime të egra në kulmet e tyre që janë bërë në të kaluarën, por kjo komunë nuk ka ndërmarrë asnjë hap, duke lejuar të degradohen dhe shëmtohen këto objekte publike.