Në kompleksin e banesave të “Ballkanit” në qytetin e Suharekës ka disa muaj që ka filluar të bëhet një mbindërtim në njërën nga ndërtesat e këtij kompleksi.
Një nga banorët e këtij komplesi i cili nuk dëshiron të identifikohet i ka dërguar disa fotografi në redaksinë e KosovaNews, ai thotë se ka disa muaj që ka filluar ky mbindërtim dhe zakonisht punohet në ditët e vikendit për të mos u vërejtur nga inspektorët.
Punimet e jashtëligjshme kanë vazhduar edhe të shtunën pa u penguar nga askush.
KosovaNews ka tentuar disa herë të kontaktojë me drejtoreshen e Inspekcionit e cila është përgjegjëse për këtë fushë, Albulena Kokollari, mirëpo ajo nuk e ka hapur telefonin edhe pas disa thirrjeve.
Është për t’u habitur se si nuk është vërejtur ky mbindërtim nga inspektorët komunal të paktën gjatë ditëve të punës ku mund të shihen qartë ndërhyjet që janë bërë në kulmin e kësaj ndërtese publike.
Edhe në ndërtesat tjera të këtij kompleksi vërehen mbindërtime të egra në kulmet e tyre që janë bërë në të kaluarën mirëpo si duket Komuna e Suharekës ka vendosur t’i mbyllë sytë duke mos ndërmarrë asnjë hap, duke lejuar të degradohen dhe shëmtohen këto objekte publike.