Studiuesi e publicisti, Shkëlzen Gashi ka komentuar takimet e djeshme dhe të sotme që emisari amerikan dhe ai i BE-së, Gabriel Escobar e Miroslav Lajçak kanë zhvilluar me krerët e institucioneve dhe liderët e partive opozitare.
Ndërmjetësit ndërkombëtar kanë ardhur për një vizitë në Prishtinën dhe mandej do të shkojnë edhe në Beogradin, në tentim për të gjetur një zgjidhje për qetësimin e situatës në tri komuna në veri të Kosovës – Zveçan, Leposaviq dhe Zubtin Potok.
Ata kanë shprehur shqetësimin e tyre për situatën dhe kanë dhënë disa propozime se si të kapërcehet gjendja e krijuar së fundi.
Por gjithë këto kanë nxitur reagimin e studiuesit e publicistit, Shkëlzen Gashi, i cili ka komentuar atë që po kërkon Serbia e që po e përcjellin ndërmjetësit si tentim për të qetësuar situatën.
Ai madje në formë kronologjike ka paraqitur atë që po kërkon Serbia, atë që po e përcjellin ndërmjetësit, kundërshtimin që po bën kryeministri Albin Kurti dhe shqetësimin e pakuptueshëm të opozitës.
“Serbia po kërkon që: (1) të tërhiqet Policia Speciale nga veriu i Kosovës; (2) kryetarët e komunave në veri të mos hyjnë në ndërtesat e komunave; dhe (3) të formohet Asociacioni i komunave me shumicë serbe. Këto kërkesa të Serbisë po i sjellin në Kosovë ndërmjetësit ndërkombëtarë. Kryeministri i Kosovës po i refuzon këto kërkesa, sepse janë kundër interesit të Kosovës. Serbia po shqetësohet. Edhe ndërmjetësit ndërkombëtarë. E kuptueshme sepse ata i mbrojnë interesat e tyre. Por, e pakuptueshme që liderët e partive politike opozitare të Kosovës shqetësohen që ndërmjetësit ndërkombëtarë janë të shqetësuar që Serbia është e shqetësuar”, ka shkruar Gashi në rrjetin social Facebook.
Në komunat në pjesën veriore, serbë lokalë po protestojnë rregullisht prej 29 majit për të kundërshtuar hyrjen e kryetarëve shqiptarë në ndërtesat komunale – të cilët fituan zgjedhjet e bojkotuara nga Lista Serbe, partia më e madhe e serbëve në Kosovë.
Këto zgjedhje kanë qenë të mbështetura nga faktori ndërkombëtar, i cili përveç që i ka bërë thirrje Listës Serbe për pjesëmarrje edhe shprehu keqardhje për bojkotin e tyre. Sido qoftë zgjedhjet janë pranuar nga ndërkombëtarët dhe nuk pati problem deri në shfaqjen e dhunës që bën persona të maskuar, e që thuhet se janë nën direktivat e Aleksadar Vuçiqit për të bërë probleme e nxitur tensione në Kosovë.
Kryeministri i Kosovës, Albin Kurti, në takim me emisarët Miroslav Lajçak e Gabriel Escobar, ka shprehur gatishmërinë “e parezervë dhe mirëbesimin e palëkundur për angazhim intensiv e të përbashkët në shtensionimin e gjendjes dhe normalizimin e marrëdhënieve”.
Në këtë rast Kurti ka theksuar se rruga para është ndalimi i sulmeve nga ekstremistët e dhunshëm e grupet kriminale.
Kreu i Qeverisë tha se vetëm sundimi i ligjit mund ta hapë rrugën e zgjedhjeve të parakohshme në komunat veriore.
Edhe presidentja e Kosovës, Vjosa Osmani, citohet t’u ketë thënë sot të dërguarve të SHBA-së dhe BE-së, Gabriel Escobarit dhe Mirosllav Lajçakut, se vetëm ndëshkimi i grupeve kriminale mund të çojë në një “stabilitet të qëndrueshëm dhe afatgjatë”.
