Policia Rajonale e Ferizajt ka njoftuar se gjatë periudhës 15-21 qershor 2026, ka shqiptuar gjithsej 1 mijë e 219 gjoba kundërvajtëse ndaj pjesëmarrësve në trafik për shkelje të ndryshme të rregullave të komunikacionit.
Po ashtu, janë pezulluar 20 patentë shoferë ndaj drejtuesve të automjeteve që kanë kryer shkelje të rënda në trafik.
Gjatë javës së kaluar, në rajonin e Ferizajt janë regjistruar gjithsej 44 aksidente trafiku, prej të cilave 21 kanë përfunduar me lëndime trupore, ku janë lënduar 28 persona, ndërsa 23 aksidente të tjera kanë shkaktuar vetëm dëme materiale.
