Deputeti i Kuvendit të Kosovës nga radhët e Vetëvendosjes, Valon Ramadani ka reaguar pas shfaqjes së propagandës së Serbisë në disa kabllorë të Kosovës.
Ai ka thënë se është koha që të ndalohen këto importe të dëmshme për vendin tonë, pasi që çkado që blihet nga shteti serb e forcon atë që të armatoset edhe më shumë e mandej të sulmojë Kosovën.
“Sa herë blen dikush prodhime dhe shërbime të Serbisë, ata fitojnë para. Ato para po i kthejnë në municione.
Terroristët që sulmuan Kosovën kishin armatim mbi 5 milionë euro.
Është detyra jonë ta zvogëlojmë maksimalisht blerjen e prodhimeve dhe shërbimeve nga Serbia.
Edhe transmetimi i futbollit kur po e blejnë platformat kosovare nga Serbia po na sjell propagandë terroriste. Prandaj është koha t’i ndalim këto importe të dëmshme”, ka shkruar në reagimin e tioj deputeti Ramadani.
Programet sportive serbe “Arena sport” që transmetohen nga disa operatorë kabllorë në Kosovë, të shtunën kanë transmetuar spot kërcënues, që ndërlidhet me rastin e Banjskës. Këto mesazhe kanë figuruar edhe gjatë mëngjesit të së dielës.
Komisioni i Pavarur për Media (KPM) ka njoftuar se ka filluar të mbledhë prova dhe se të martën në mbledhjen e saj do të vendosë për rastin.
“Mbrëmë jemi lajmëruar nga qytetarë të shumtë se disa nga operatorët e shpërndarjes që janë të licencuar nga KPM po transmetojnë në platformat e tyre video mesazhe kërcënuese për rendin dhe sigurinë kombëtare. Sot kemi filluar menjëherë me mbledhjen e provave. Nesër i analizojmë gjetjet kurse të martën vendosim për rastin në mbledhjen e Komisioni”, ka shkruar në Facebook, kryesuesi i KPM-së, Jeton Mehmeti.
Në spotin e shfaqur shkruante edhe “Manastiri i Banjskës” dhe data e 24 shtatorit, kur ndodhi rasti.
Serbia ka thurur lavde për sulmuesit që u vranë gjatë aktit terrorist në Kosovë. Madje ka shpallur edhe ditë zie për ta.
