Ministri i Shëndetësisë, Arben Vitia, në konferencën pas mbledhjes së Qeverisë së Kosovës, ka thënë se këtë javë do të bëhet publike Lista e re e barnave esenciale.
Ai ka thënë se buxheti për këtë Listë është dyfishuar nga viti 2019.
“Pas shumë debateve dhe pas një angazhimi shumë të madh të profesionisteve shëndetësorë, gjatë kësaj jave do të kemi Listën e re të barnave esenciale, e cila ka reflektuar përveç kërkesave edhe nevojave për institucionet tona shëndetësore në raport me këto barna, për t’i siguruara për qytetarët e Republikës, është reflektuar edhe rritje substanciale e buxhetit, nga rreth 30 milionë euro në vitin 2019, këtë vit do të kemi një buxhet për këtë listë rreth 60 milionë euro që i bije gati dyfishin”, ka theksuar Vitia.
Ai ka thënë se presin që me këtë buxhet dhe më këtë listë të tejkalohen problemet në sigurimin e barnave dhe materialit shpenzues.
“Përkundër të gjitha problemeve dhe shqetësimeve që në raport me sigurimin e kësaj liste për të gjithë periudhën pas luftës është haur në mungesa të mëdha të barnave dhe materialeve shpenzuese në institucionet tona shëndetësore, me këtë buxhet dhe më këtë listë të re presim që gjatë këtij viti të vendosim edhe disa standarde të cila njëherë e mirë do të tejkalojnë problemet në sigurimin e barnave dhe materialit shpenzues”, ka deklaruar Vitia.
