Zëvendësministri i Shëndetësisë, Arsim Berisha ka mirëpritur fillimin e procesit për themelimin e Fondit të Sigurimit të Detyrueshëm të Kujdesit Shëndetësor të Republikës së Kosovës, duke e cilësuar këtë si një hap të rëndësishëm drejt forcimit të sistemit shëndetësor në vend.
Përmes një reagimi publik, Berisha ka theksuar se hyrja në fuqi e Ligjit për Sigurimin e Detyrueshëm të Kujdesit Shëndetësor më 1 qershor 2026 shënon një moment të rëndësishëm për sektorin e shëndetësisë dhe krijon bazën për një sistem më të drejtë, më të qëndrueshëm dhe më efikas.
Ai ka vlerësuar se nisja e procedurave për themelimin e fondit përbën hapin e parë konkret në zbatimin e kësaj reforme të shumëpritur, e cila synon të rrisë mbrojtjen shëndetësore të qytetarëve dhe të përmirësojë qasjen në shërbime cilësore shëndetësore.
Sipas Berishës, kjo reformë do të sjellë më shumë siguri për qytetarët, më shumë mbështetje për pacientët dhe investime më të mëdha në shëndetin publik.
“Vazhdojmë me punë. Krejt për shtet, shtet për krejt”, ka deklaruar ai.
