Shtetet e Bashkuara të Amerikës dhe Irani kanë rënë dakord të ndalin armiqësitë e ditëve të fundit në Gjirin Persik dhe të rikthehen në tryezën e bisedimeve për mosmarrëveshjet rreth Ngushticës së Hormuzit, një nga rrugët më të rëndësishme detare për transportin global të energjisë. Lajmi u konfirmua nga një zyrtar amerikan për Reuters.
Sipas zyrtarit, bisedimet teknike do të vazhdojnë mbi të gjitha pikat e Memorandumit të Mirëkuptimit me 14 pika, të arritur më 17 qershor, ndërsa të dyja palët janë pajtuar që përkohësisht të tërhiqen nga veprimet ushtarake dhe të lejojnë lëvizjen e lirë të anijeve në Ngushticën e Hormuzit.
Marrëveshja vjen pas disa ditësh përshkallëzimi të tensioneve, gjatë të cilave Irani lëshoi raketa dhe dronë ndaj bazave ushtarake amerikane në Bahrein dhe Kuvajt, ndërsa SHBA-ja kreu sulme kundër objektivave iraniane pas goditjes së një anijeje tregtare në Hormuz. Të dyja palët kanë akuzuar njëra-tjetrën për shkelje të armëpushimit të përkohshëm të arritur më herët këtë muaj.
Sipas raportimeve, bisedimet pritet të rifillojnë këtë javë në Doha të Katarit, me synim ruajtjen e marrëveshjes së ndërmjetme të paqes dhe garantimin e sigurisë së lundrimit në ngushticën strategjike.
Ndërkohë, situata në rajon mbetet e brishtë. Izraeli njoftoi të dielën se ka kryer sulme të reja kundër pozicioneve të Hezbollahut në Libanin jugor, ndërsa Teherani ka paralajmëruar se stabiliteti i marrëveshjes më të gjerë varet edhe nga përfundimi i luftimeve në Liban.
Presidenti amerikan, Donald Trump, kishte paralajmëruar më herët se SHBA-ja mund të ndërmerrte veprime të mëtejshme ushtarake nëse Irani nuk do t’i përmbahej marrëveshjes, duke shtuar presionin mbi një armëpushim që tashmë është vënë në provë nga sulmet e ndërsjella të ditëve të fundit.
Rifillimi i dialogut ka sjellë gjithashtu lehtësim në tregjet ndërkombëtare të energjisë, të cilat janë tronditur nga pasiguria rreth qarkullimit të naftës përmes Ngushticës së Hormuzit, pikë kyçe për eksportet energjetike të Lindjes së Mesme.
