Kryetari i Partisë Republikane në Serbi, Nikola Sanduloviq, deklaroi në intervistë ekskluzive për RTK-në, se nuk ka kryer asnjë vepër penale për të cilën akuzohet.
Në intervistën që transmetohet sonte në edicionin e lajmeve të orës 19:30 në RTK, Sanduloviq paralajmëron se do të kërkojë përgjegjësi ligjore për torturën qe e ka përjetuar.
Sanduloviq, i cili është në përkujdesje në shtëpi pas lirimit nga paraburgimi, tha se i është nënshtruar dhunës disa orëshe nga pjesëtarët e BIA-s. Si pasojë, ai ka tani lëndime të rënda trupore.
BIA dhe prokuroria mohuan se Sanduloviq i është nënshtruar torturës.
Ai akuzohet “për veprën penale të nxitjes së urrejtjes dhe jotolerancës kombëtare, racore dhe fetare”.
Kjo pasi në rrjetet sociale, Sanduloviq njoftoi se ka kërkuar falje për krimet e Serbisë ndaj shqiptarëve dhe ka vendosur lule në varret e familjes Jashari në Prekaz.
Intervista e plotë do të publikohet në RTKlive sonte në ora 20:00.
