Kryeministri në detyrë, Albin Kurti, ka bërë të ditur se Fondi i Kursimeve Pensionale i Kosovës (Trusti) ka arritur rezultatin më të lartë investues në historinë e tij brenda një gjysmëviti, me rreth 312 milionë euro kthim bruto nga investimet gjatë periudhës 1 janar – 30 qershor 2026.
Përmes një postimi në Facebook, Kurti theksoi se nga fillimi i vitit 2023 deri në fund të qershorit 2026, Trusti ka gjeneruar gjithsej rreth 956 milionë euro kthim bruto nga investimet.
Sipas tij, kthimet janë ndarë në 88 milionë euro gjatë vitit 2023, 247 milionë euro në vitin 2024, 309 milionë euro në vitin 2025 dhe 312 milionë euro vetëm në gjashtëmujorin e parë të vitit 2026.
“Këto shifra janë lajm i mirë për qindra mijëra kontribuues, kursimet e të cilëve ruhen dhe investohen për sigurinë e tyre financiare pas pensionimit”, ka shkruar Kurti.
Ai ka vlerësuar se këto rezultate dëshmojnë rëndësinë e qeverisjes së mirë, profesionalizmit, integritetit dhe përgjegjësisë institucionale, duke shtuar se institucionet publike përparojnë kur përgjegjësitë u besohen profesionistëve dhe interesi i qytetarëve vendoset mbi çdo interes tjetër.
Kurti ka përgëzuar Bordin, menaxhmentin dhe punonjësit e Trustit për punën e tyre, duke bërë të ditur se vlera e përgjithshme e Fondit të Kursimeve Pensionale të Kosovës ka arritur në 4 miliardë e 245 milionë euro.
“Duke e respektuar pavarësinë institucionale dhe profesionale të Trustit, do të vazhdojmë të kontribuojmë në përmirësimin e kuadrit ligjor, në mënyrë që kursimet pensionale të qytetarëve të menaxhohen me siguri, transparencë dhe perspektivë afatgjatë”, ka deklaruar Kurti.
Në përfundim, ai e ka cilësuar këtë si “një rezultat të mirë për Trustin, një lajm të mirë për kontribuuesit dhe një arritje të rëndësishme për Republikën tonë”.
