Ish- pjesëtari i UÇK-së, Sadik Halitjaha, është dëshmitari i 36-të i cili do të dëshmojë në rastin e ish-udhëheqësve të Shtabit të Përgjithshëm të UÇK-së.
Nëndega e Organizatës së Veteraneve të Luftës së Ushtrisë Çlirimtare të Kosovës në Mushtisht, kishte njoftuar më 7 nëntor se ish-eprori i UÇK-së, Halitjaha, është marrë nga Specialja.
Halitjaha është ish-zëvendëskomandant i Zonës Operative të Pashtrikut.
Halitjaha ishe ftuar nga Prokuroria Speciale e Dhomave të Specializuara të Kosovës edhe në tetor të vitit të kaluar.
Më 19 tetor 2022, Halitjaha në llogarinë e tij në Facebook, kishte shkruar lidhur me Gjykatën Speciale, duke deklaruar se “më mirë një fund i një të keqe, sesa një e keqe pa fund!”.
Kurse dëshmitari i 35-të e ka kryer po sot dëshminë e tij në rastin ku ish-udhëheqësit e Shtabit të Përgjithshëm të UÇK-së po akuzohen për krime lufte dhe krime kundër njerëzimit.
Ai gjatë dëshmisë së tij ka pohuar se arrestimi dhe ndalimi i tij në fshatin Likoc nga pjesëtarët e Ushtrisë Çlirimtare të Kosovës nuk kishte lidhje as me këta të fundit e as me luftën.
