Nëndega e Organizatës së Veteraneve të Luftës së Ushtrisë Çlirimtare të Kosovës në Mushtrish, ka njoftuar se ish-eprori i UÇK-së, Sadik Halitjaha, është marrë nga Specialja.
Në një postim në Facebook të kësaj nëndege thuhet se ai është marrë të martën, por nuk sqarohet se në çfarë cilësie.
“Kjo marrje nuk ishte sikur të tjerat, nuk ishte nga Prokuroria Speciale, por nga Gjykata! Urojmë të ja dalë për së mbari komandanti që kurrë në jetë nuk njohu dështim! Si në luftë ashtu në paqe përherë gardian i atdheut!”, thuhet ndër të tjera në njoftim.
Halitjaha ishe ftuar nga Prokuroria Speciale e Dhomave të Specializuara të Kosovës edhe në tetor të vitit të kaluar.
Më 19 tetor 2022, Halitjaha në llogarinë e tij në Facebook, kishte shkruar lidhur me Gjykatën Speciale, duke deklaruar se “më mirë një fund i një të keqe, sesa një e keqe pa fund!”.
Madje, ai i kishte bërë një parashikim se cilat do të ishin të këqijat më të mëdha, sesa krijimi i kësaj gjykate.
“Po të dështonte lufta e të kapitullonim pa kushte, të gjithë luftëtarët e mbetur gjallë do të gjykoheshin në Beograd, sepse këtu do të ishte Serbi!”, kishte shkruar ai ndër të tjera.
Më tre nëntor të këtij viti, Zyra e Prokurorit të Specializuar ka arrestuar ish-kryetarit të Malishevës, Isni Kilaj.
Të hënën Specialja ka njoftuar se Kilajt i ka vazhduar paraburgimi. Urdhri për arrestimin e Isni Kilajt u lëshua nga Prokurorja e Specializuar për vepra penale kundër administrimit të drejtësisë, përfshirë pengim të personave zyrtarë në kryerjen e detyrave zyrtare sipas Kodit Penal të Kosovës të vitit 2019 dhe shkelje të fshehtësisë së procedurës dhe Ligjit për Dhomat e Specializuara të Kosovës dhe Zyrën e Prokurorit të Specializuar.
