Menaxhmenti i Radiotelevizionit të Kosovës (RTK) përmes një komunikate për media ka sqaruar se mos-angazhimi i disa redaktorëve në moderim në disa emisione ka ardhur si rezultat i riorganizimit të stafit.
Lidhur me këto largime pati reagim nga gjashtë moderatorët, Asociacioni i Gazetarëve të Kosovës, Sindikata e Punëtorëve të RTK-së dhe Federata Ndërkombëtare e Gazetarëve, duke e cilësuar si ‘sulm ndaj fjalës dhe censurë e arbitraritet”.
“RTK po kalon një fazë avancimi programor dhe organizativ, me qëllim rritjen e cilësisë së përmbajtjes në të gjitha kanalet dhe platformat, me fokus të veçantë në forcimin e kanalit informativ RTK3. Në këtë kuadër janë ndërmarrë disa riorganizime të stafit, të cilat janë vendime të natyrës menaxheriale dhe nuk kanë karakter ndëshkues apo disiplinor”- thuhet në komunikatën e RTK-së.
Sipas RTK-së, kontratat e punës së redaktorëve mbeten të paprekura. “Detyrat e tyre lidhen me redaktim dhe mbikëqyrje editoriale, jo me moderim, ndaj lirimi i tyre nga ky rol është në përputhje me kontratat dhe rregulloret e brendshme”.
Derisa, pretendimet për “censurë” apo “heshtje të zërit profesional”, RTK thotë se nuk qëndrojnë. “Redaktorët vazhdojnë të kenë liri dhe të drejtë të plotë editoriale, të cilën e demonstrojnë përmes paraqitjeve publike në programet e RTK-së, si asnjëherë më parë.
Në komunikatë më tej u potencua se “Ndonëse RTK po funksionon në rrethana jo të zakonshme, kjo gjendje nuk do ta pengojë institucionin në avancimin e ofertës programore dhe përmirësimin e proceseve të punës”.
“Në asnjë rast kjo situatë nuk mund të shfrytëzohet nga punonjësit e RTK-së për të bërë prononcime në rrjete sociale me përmbajtje politike, ofenduese, apo të papajtueshme me etikën dhe standardet profesionale” – thuhet tutje në reagim.
RTK potencoi se çdo deklarim i pabazuar në fakte, që përhap dezinformata duke dëmtuar integritetin e institucionit, nuk do të tolerohet tutje dhe “të gjitha këto veprime do të trajtohen në përputhje me ligjin dhe rregulloret e RTK-së në fuqi”.
“Si transmetues publik, RTK është e përkushtuar ndaj transparencës, respektimit të ligjit dhe kontratave, pavarësisë editoriale dhe objektivitetit, me theks ofrimin e përmbajtjes cilësore për qytetarët e Kosovës. Në këtë kuadër, RTK thekson se respekton lirinë e shprehjes dhe të drejtën e gazetarëve për të punuar pa ndërhyrje, ndërsa çdo shqetësim i ngritur nga redaktorët, apo publiku do të trajtohet me seriozitet dhe në përputhje me ligjin dhe standardet profesionale”- thuhet tutje në komunikatë.
Më 25.08.2025, gazetarët dhe moderatorët, Blerta Foniqi Kabashi, Meneta Zekaj Nushi, Jehona Zhitia, Edona Musa, Arton Mulliqi dhe Valon Bajrami ishin njoftuat nga menaxhmenti i Radiotelevizionit të Kosovës se nga 01.09.2025 nuk do jenë më pjesë e moderimit të emisioneve.
Lidhur me këtë, pati shumë reagime nga vetë moderatorët, por edhe nga Asociacioni i Gazetarëve të Kosovës dhe Federata Ndërkombëtare e Gazetarëve.
Blerta Foniqi Kabashi përmes një reagimi në profilin e saj në Facebook shkroi se kjo ishte censurë dhe përjashtim arbitarë. “Të premten, në fund të orarit të punës, morëm një njoftim të paparalajmëruar dhe joligjor, me të cilin nga data 1 shtator, përjashtohemi nga moderimi i emisioneve, përkatësisht i magazinës së orës 17:00 dhe lajmeve të orës 23:00”- shkroi ajo.
“Tendenca është e qartë dhe e shpërfaqur hapur. Këtë e vërteton edhe fakti i paralajmërimeve për heqjen nga skema programore të magazinave informative, sa herë që në këto magazina janë realizuar intervista me të ftuar nga partia në pushtet, të cilët kanë shprehur pakënaqësi nga ballafaqimi profesional”- shtoi tutje.
Ajo shtoi se “vendimi i fundit arbitrar ka vetëm një qëllim: heshtjen e zërit të panënshtruar dhe profesional brenda Transmetuesit Publik”.
Derisa, gazetarja dhe moderatorja Jehona Zhitia shkroi se lufta për t’i larguar nga ekrani dhe për të shuar gazetarinë profesionale brenda RTK-së ka kohë që ka nisur. “Që nga janari i këtij viti, unë dhe kolegët e mi, po përballemi me presion të vazhdueshëm dhe me veprime arbitrare që synojnë të na heshtin”- shkroi ajo.
“Nga partia në pushtet po akuzohemi se jemi kundër tyre. Madje në një debat televiziv sonte një përkrahës i VV-së, i cili më së paku luan rolin e analistit politik tha se ajo çka ka ndodhë të premten me 6 redaktorët në RTK, është lajm i mirë por i vonuar”- shtoi tutje.
Asociacioni i Gazetarëve të Kosovës përmes një reagimi u shprehën se veprimin e Menaxhmentit si ndëshkim ndaj 6 gazetarëve për punën e tyre profesionale, “të pandikuar politikisht dhe për ngritjen e zërit për vonesën e pagave”. “Kjo është një dëshmi e re, të shqetësimit të ngritur me kohë nga AGK-ja, se Menaxhmenti aktual është vënë në shërbim të plotë të Qeverisë Kurti, dhe partisë politike në pushtet, Vetëvendosje”- thuhet në reagim.
Derisa, sindikata e punëtorëve të RTK-së tha se vendimi nuk ka bazë ligjore. “Kujtojmë se, sipas skemës programore, ndryshimet e tilla mund të bëhen vetëm me vendim të Bordit të RTK-së. Aktualisht, Bordi i RTK-së është i paplotësuar dhe, si i tillë, nuk ka marrë një vendim për këtë çështje. Çdo veprim jashtë kësaj procedure përbën shkelje të bazës ligjore dhe normative të brendshme”- theksuan në reagim.
