Agjencia e Punësimit e Republikës së Kosovës (APRK) ka njoftuar se gjatë periudhës së fundit janë identifikuar disa raste të falsifikimit dhe shitjes së certifikatave të rreme në emër të këtij institucioni, kryesisht përmes platformave online dhe rrjeteve sociale.
Sipas njoftimit zyrtar, këto veprime përbëjnë mashtrim ndaj qytetarëve dhe cenojnë integritetin e institucioneve publike. APRK u bën thirrje të gjithë qytetarëve që të tregohen të kujdesshëm dhe të mos bien pre e ofertave të dyshimta.
Institucioni thekson se çdo certifikatë e lëshuar nga Agjencia e Punësimit është e verifikueshme përmes kanaleve zyrtare dhe lëshohet vetëm në përputhje me procedurat ligjore në fuqi.
APRK ka ftuar qytetarët që, në rast se hasin në oferta të tilla apo dyshime për falsifikim, t’i raportojnë menjëherë tek organet kompetente ose drejtpërdrejt pranë Agjencisë së Punësimit.
Autoritetet theksojnë se bashkëpunimi i qytetarëve është kyç për parandalimin e mashtrimeve dhe ruajtjen e besimit në institucionet publike.
