Bashkimi Europian ka mirëpritur vendimin e djeshëm të Qeverisë së Kosovës për heqjen e ndalesës së mallrave serbe.
Zyra e BE-së në Kosovë, përmes një komunikate për media, tha se tregtia e lirë është çelësi për funksionimin e tregut të përbashkët rajonal e ky është “pjesë integrale e planit të rritjes”.
“Mirëpresim heqjen e kufizimeve për hyrjen e produkteve të gatshme serbe në Kosovë përmes Merdarës. Tregtia e lirë e mallrave në të gjithë Ballkanin Perëndimor, në përputhje me rregullat e CEFTA-s, është çelësi për funksionimin e tregut të përbashkët rajonal, i cili është pjesë integrale e planit të rritjes. Për të mirën e njerëzve dhe të bizneseve!”.
Lidhur me këtë ka reaguar sërish edhe ambasadori gjerman në Kosovë, Jorn Rohde.
Përmes një postimi në platformën “X”, Rohde ka shpërndarë deklaratën e Zyrës së BE-së, duke thënë: “Tregtia e lirë jo vetëm që nxit ekonomitë lokale dhe rajonale, por gjithashtu hap dyert për pjesëmarrje në iniciativat rajonale dhe europiane. Shumë mirë të shoh se po ndodh kjo!” shkroi Rohde.
