Ministrja e Ekonomisë, Artane Rizvanolli ka dhënë detaje të reja për situatën në “Ibër Lepenc” pas situatës së krijuar nga shpërthimi terrorist që ndodhi në kanalin “Ibër Lepenc”.
Ministrja ka njoftuar se pas një pune intensive tashmë është bërë një zgjidhje e re inxhinierike ku në kanal është vendosur një kontejner i madh i hekurit ku përmes tij po kalon i gjithë uji i kanalit.
Rizvanolli ka njoftuar se se komunat që furnizohen me ujë nga “Ibër Lepenci” mund të kenë reduktime gjatë ditës së sotme për shkak të punimeve që kanë ndodhur gjatë natës.
“Për shkak të rrjedhjeve të ujit në pjesën e kanalit që është dëmtuar nga sulmi terrorist, për të ruajtur sigurinë e kanalit, ka qenë e domosdoshme të bëhet një zgjidhje e re inxhinierike.
Për të realizuar punët në kanal, furnizimi i kanalit me ujë është ndërprerë mbrëmë në mesnatë. Si rrjedhojë, komunat që furnizohen me ujë nga “Ibër Lepenci” mund të kenë reduktime gjatë ditës së sotme.
Intervenimet në kanal sapo kanë përfunduar dhe furnizimi i kanalit me ujë ka rifilluar, ndërsa nivelet e ujit në termocentralin “Kosova B” janë monitoruar dhe kanë qenë të mjaftueshme përgjatë gjithë kohës. Sikurse edhe gjatë dy ditëve të kaluara, prioritet i parë do të mbetet furnizimi i mjaftueshëm i termocentralit me ujë për ftohje, për të zgjeruar pastaj furnizimin për KRU-të sa më herët që është e mundshme.
Qytetarët inkurajohen të ndjekin njoftimet e kompanive rajonale të ujësjellësit për informata të sakta rreth furnizimit me ujë.
Falemnderit ekipit të “Ibër Lepencit” dhe kontraktorit për punën në kanal, dhe ministrit Xhelal Sveçla dhe zv.ministrit Hysen Drumishi që kanë përcjellë nga afër punën në terren gjatë gjithë natës”, shkruan Rizvanolli në njoftim
