Kryeministri i Kosovës, Albin Kurti, ka thënë se sot e ka vizituar Shërbimin Spitalor Klinik Universitar të Kosovës për të shprehur mbështetjen e tij ndaj drejtorit të Njësisë së Auditimit të Brendshëm të ShSKUK-së, Musa Vitija.
Drejtorit të Auditimit në ShSKUK, Musa Vitija i është djegur ditë më parë vetura e dytë brenda tre muajsh.
E deklaratat mbështetëse të kryeministrit Albin Kurti për zyrtarin Vitija dhe kërkimi i llogarisë, kanë nxitur reagimin e Sami Lushtaku, i cili e ka cilësuar “të motivuar politikisht” denoncimin e bërë nga kryeministri ndaj kompanisë “Security Code”, e cila është në bashkëpronësi të nipit të tij, Milazim Lushtakut.
Në një deklarim për media të cilën e transmeton Indeksonline, Lushtaku i cilësoi si sulme “të motivuara politikisht” komentet e kryeministrit ndaj kompanisë e cila është përgjegjëse për ruajtjen e sigurisë në Qendrën Klinike Universitare të Kosovës.
“Edhe Serbia qishtu na ka ndjek si Albin Kurti”, tha Lushtaku.
“Ai është marrë me këtë kompani për shkakun tim, normal”, është shprehur Lushtaku.
Kryeministri Albin Kurti ka thënë se pas një pune intensive janë gjetur shkelje të shumta të dokumentuara në raport përkatës që ka bërë zyrtari të cilin i janë djegur mandej veturat.
E Kurti tha se dy kompanitë, “Security Code” që është përgjegjëse për sigurimin fizik dhe “Quantic”, përgjegjëse për mbikëqyrjen e kamerave, kanë dështuar në kryerjen e punës së tyre.
E para, sipas Kurtit sepse për herë të dytë nuk ka arritur të ofroj sigurinë e veturës së zyrtarit Vitija, kurse tjetra edhe pas dy jave nuk ka arritur t’i rikthej në funksion kamerat e sigurisë të cilat janë të dëmtuara nga “vetëtima”.
“Të korruptuarit dhe kriminelët zjarrvënës e kanë vendin në burg, e jo jashtë tij ku lirinë e përdorin si mundësi për të përsëritur krimin”, ka thënë mes tjerash Kurti, raporton KosovaNews.
Njëra prej këtyre kompanive, “Security Code”, është në pronësi të Milazim Lushtakut, kushëririt të Sami Lushtakut, funksionarit të Partisë Demokratike të Kosovës.
