Kandidati për deputet nga radhët e Vetëvendosjes, Valon Ramadani ka reaguar publikisht ndaj publikimeve të fundit të mediumit “Infokusi”, të cilat i ka cilësuar si shpifëse dhe të orkestruara me qëllim dëmtimin e imazhit të tij dhe të familjes së tij në prag të zgjedhjeve.
Sipas Ramadanit, publikimi i këtyre pretendimeve një ditë para procesit zgjedhor është bërë me qëllim që ai të mos ketë kohë të mjaftueshme për t’i sqaruar para elektoratit dhe për të dëshmuar, sipas tij, pavërtetësinë e tyre.
Ai ka bërë të ditur se do të iniciojë menjëherë procedura ligjore ndaj personave dhe subjekteve që, sipas tij, kanë publikuar ose shpërndarë këto pretendime, duke paralajmëruar padi për shpifje.
Ramadani gjithashtu ka njoftuar se do të angazhojë hulumtues për të identifikuar, siç është shprehur ai, porositësit e sulmit që e ka cilësuar si të ulët dhe të motivuar politikisht.
“Do të nis menjëherë padi ndaj tyre dhe ndaj çdo personi që shpërndan ato shpifje. Njëkohësisht do të angazhoj hulumtues për të kuptuar se cilët janë porositësit e këtij sulmi të ulët”, ka deklaruar Ramadani.
