Kryeministri Edi Rama deklaroi se “pa Partinë Socialiste s’do kishte lindur kurrë drejtësia e re”.
Në mbledhjen e Asamblesë së zgjeruar të Partisë Socialiste dje në Peshkopi, kryeministri Rama u ndal te Reforma në Drejtësi.
“Është sot kollaj të fillosh e të thuash ‘ja se këta, këta janë njësoj. Tani erdhi SPAK, do ua tregoj qejfin të gjithëve’. A thua se SPAK erdhi nga Hëna. SPAK as nuk erdhi nga Hëna, as nuk erdhi nga Amerika, as nuk erdhi nga BE-ja”, tha Rama.
Ai theksoi se “SPAK erdhi nga ajo nevojë e madhe e shoqërisë shqiptare për drejtësi, të cilën e mori përsipër ta adresojë Partia Socialiste e Shqipërisë”.
“Dhe patjetër, kjo reformë nuk do të bëhej dot, nëse nuk do të kishim mbështetjen e fuqishme të aleatëve tanë, Shtetet e Bashkuara, Bashkim Evropian, dihet, por ama Shtetet e Bashkuara dhe Bashkimi Evropian në Shqipëri kanë qenë që në ’91, nuk kanë ardhur në Shqipëri në 2013, as në 2023. Kanë ardhur në ’91 dhe nëse kjo do të ishte një çështje e një prodhimi të gatshëm që vjen me avion, do e kishin sjellë me kohë, por nuk është”, u shpreh Kryeministri.
