Kryetari i Prishtinës, Përparim Rama, ka reaguar lidhur me ekspozitën e cila u organizua nga INTEGRA dhe Admovere, duke bërë të ditur se leja për ekspozimin në sheshin e kryeqytetit është pezulluar.
“Ekspozita e financuar nga Kuvendi i Kosovës paraqet një version të pasaktë dhe të papranueshëm të Masakrës së Dubravës. Kjo është e papranueshme dhe përbën fyerje të drejtpërdrejtë ndaj viktimave dhe gjithë qytetarëve të Kosovës”, ka shkruar Rama në reagim e tij.
Rama ka theksuar se në sheshin e Prishtinës nuk do të lejohet, siç u shpreh ai, “të përdhoset dinjiteti i qytetarëve dhe të fyhet kujtesa kolektive e popullit”.
Për këtë arsye, sipas tij, leja për këtë ekspozim është pezulluar menjëherë.
Njëkohësisht, Rama ka kërkuar përgjegjësi politike dhe institucionale nga Kuvendi i Kosovës për miratimin dhe financimin e një përmbajtjeje të tillë, të cilën e ka cilësuar si skandaloze.
