Gjatë mbledhjes së sotme të Qeverisë së Kosovës është shqyrtuar edhe propozim-vendimit për ndryshimin dhe plotësimin e vendimit 03/66 të datës 1 mars 2022, që ka të bëjë me vazhdimin e mbështetjes nga Qeveria për qëndrimin e gazetarëve ukrainas në Kosovë.
Ministrja e Punëve të Jashtme, Donika Gërvalla tha se sot është dita më e mirë për ta sjellë në qeveri këtë propozim, pasi sot është dita e pavarësisë së Ukrainës.
Ajo propozoi që periudha kohore e qëndrimit të gazetarëve ukrainas të zgjatet.
“Propozohet që kufizimi kohor të zgjatet dhe pika 4 të ndryshohet në ‘deri në ndryshimin e rrethanave në Ukrainë’”, tha Gërvalla.
Qeveria e Kosovës qysh pak ditë pasi nisën luftimet ka vendosur që të strehojë disa gazetarë ukrainas të cilët kanë ikur nga shteti pas nisjes së pushtimit të Ukrainës nga Rusia.
Kryeministri i Kosovës, Albin Kurti, në muajin mars përmes një postimi në Twitter e konfirmoi lajmin, duke thënë se këtyre gazetarëve do t’iu mundësohet të punojnë nga distanca.
Njoftimi i tij erdhi asi Ministria e Punëve të Jashtme dhe Diasporës kërkoi nga ekzekutivi që të ndajë 150,000 euro për pranimin e tyre.
Shuma prej 150,000 eurosh do të përdoret për të mbuluar shpenzimet e qirasë, zyrave, sigurimeve shëndetësore, pagesës mujore dhe shpenzimeve të transportit për gazetarët ukrainas gjatë qëndrimit , në Kosovë.
Përzgjedhja e gazetarëve që janë strehuar në Kosovë është bërë nga Federata Evropiane e Gazetarëve dhe Qendra Evropiane për Liri të Shtypit dhe Medias, në bashkëpunim me Qeverinë e Kosovës.
Kosova i është bashkuar Shteteve të Bashkuara dhe Bashkimit Evropian duke vendosur sanksione ndaj Federatës Ruse, e cila nisi pushtimin e Ukrainës më 24 shkurt.
