Qeveria e Kosovës sot ka mbajtur mbledhje elektronike në të cilën ka miratuar nismën për lidhjen e Marrëveshjes për ndryshimin dhe plotësimin e Marrëveshjes për Transportin Ndërkombëtar Rrugor të Mallrave dhe në Transportin e Kombinuar ndërmjet Qeverisë së Republikës së Kosovës dhe Qeverisë së Republikës së Austrisë.
Gjithashtu në njoftimin e Qeverisë thuhet se është miratuar edhe nisma për lidhjen e Marrëveshjes për ndryshimin dhe plotësimin e Marrëveshjes për Transportin Ndërkombëtar Rrugor të Udhëtarëve si shërbim i rregullt dhe jo i rregullt ndërmjet Qeverisë së Republikës së Kosovës dhe Qeverisë së Republikës së Austrisë.
Kujtojmë në fillim të këtij muaji, një kamion me mallra nga Kosova ishte bllokuar në kufirin e Austrisë.
Kjo pasi që autoritetet austriake nuk po lejojnë që kamioni me mallra i kompanisë Poly Logistic të kalojë transit në shtetin e tyre.
Përkundër insistimit të vazhdueshëm, Rrahim Blakqori nga nga Poly Logistic ka thënë se autoritet e Kosovës nuk po mundin t’iu bëjnë një zgjidhje.
Ndërsa, Ministria e Infrastrukturëskishte deklaruar se kjo barrierë vjen si shkak i mungesës së lejeve transit që Austria nuk i ka dhënë.
Ekzekutivi kosovar, po ashtu ka miratuar edhe nismën për lidhjen e Marrëveshjes për Shërbime Ajrore ndërmjet Qeverisë së Republikës së Kosovës dhe Qeverisë së Malit të Zi.
