Presidenti rus Vladimir Putin në një intervistë të publikuar këtë të enjte thotë se Rusia do të marrë kontrollin e plotë të rajonit ukrainas të Donbasit me forcë, nëse forcat ukrainase nuk tërhiqen prej andej, një veprim që Kievi e refuzon.
Putin dërgoi dhjetëra mijëra trupa në Ukrainë në shkurt të vitit 2022, pas tetë vitesh luftimesh midis separatistëve të mbështetur nga Rusia dhe trupave ukrainase në Donbas, i cili përbëhet nga Donetsku dhe Luhansku.
“Ose do t’i çlirojmë këto territore me forcën e armëve, ose trupat ukrainase do të largohen nga këto territore”, tha Putin për India Today përpara një vizite në New Delhi, sipas një fragmenti të transmetuar në televizionin shtetëror rus.
Ndërkohë Presidenti ukrainas Volodymyr Zelensky ka thënë se Moska nuk do të shpërblehet për një luftë që filloi duke deklaruar: “Ukraina nuk dëshiron t’i japë Rusisë territor që Moska nuk arriti ta fitojë në fushën e betejës”.
Rusia aktualisht mban 19.2 përqind të Ukrainës, përfshirë Krimenë, të cilën e aneksoi në vitin 2014, të gjithë Luhanskun, më shumë se 80 përqind të Donetskut, rreth 75 përqind të Khersonit dhe Zaporizhias, dhe pjesë të rajoneve Kharkiv, Sumy, Mykolaiv dhe Dnipropetrovsk.
Rreth 5,000 kilometra katrorë të Donetskut mbeten nën kontrollin e Ukrainës. Në bisedimet me Shtetet e Bashkuara mbi skicën e një marrëveshjeje të mundshme paqeje për t’i dhënë fund luftës, Rusia ka thënë vazhdimisht se dëshiron kontrollin e të gjithë Donbasit dhe se Shtetet e Bashkuara duhet ta njohin jozyrtarisht kontrollin e Moskës.
Rusia shpalli rajonet ukrainase të Luhanskut, Donetskut, Khersonit dhe Zaporizhias pjesë të Rusisë në vitin 2022 pas referendumeve që Perëndimi dhe Kievi i kanë hedhur poshtë si mashtruese.
Sakaq, Putin priti të martën në Kremlin të dërguarit e SHBA-së Steve Witkoff dhe Jared Kushner dhe tha se Rusia kishte pranuar disa nga propozimet e SHBA-së për Ukrainën dhe se bisedimet duhet të vazhdojnë.
