Ka nisur protesta njëorëshe e Këshillit të Prindërve të shkollës fillore “Faik Konica”, në Prishtinë.
Në oborrin e shkollës janë mbledhur prindër të shumtë që po kundërshtojnë mbajtjen e grevës së nisur më 25 gusht.
Bashkë me prindërit në protestë kanë dalë edhe shumë nxënës. Ata po mbajnë pankarta me mbishkrimet “Nxënësit nuk janë vlerë monetare”.
“Nuk e kemi kundër mësimdhënësve, por është java e katërt që s’po mbahet mësimi. Është e patolerueshme. Nuk kërkojmë fajtorë, kërkojmë zgjidhje”, deklaroi një protestues.
Një prind tjetër deklaroi se Qeveria duhet të bëjë çdo gjë që procesi mësimor të fillojë, duke shtuar se SBASHK-ut nuk duhet dhënë rëndësi.
“I isha lutur çdo mësuesi e arsimtari, që për hir të fëmijëve, t’ia vendosim pikën. E kuptoj se Qeveria i ka ato adutet e veta, por sindikatës më së paku duhet t’i japim rëndësi. Nuk jam që greva të vazhdojë, sepse u zgjat. Si prind do të bëj çdo gjë. Do t’i mobilizojë të gjithë kolegët e mi që janë në pension, të shkojnë pa pagesë të mbajnë mësim”, deklaroi ai.
Mësimdhënësit janë në grevë nga 25 gushti dhe ndër kërkesat kryesore të tyre është ndarja e 100 eurove shtesë në muaj deri në futjen në fuqi të Ligjit për pagat.
Disa shkolla tashmë kanë ndërprerë grevën në nivel vendi.
