Prokuroria Speciale e Republikës së Kosovës (PSRK) ka parashtruar kërkesë për caktimin e masës së paraburgimit ndaj 6 të dyshuarve për falsifikim të monedhave 2-euroshe.
Në kërkesën Prokurorisë të cilën e ka siguruar “Betimi për Drejtësi” thuhet se ekziston dyshimi se të pandehurit B.A, Sh.A, A.A, S.R, M.K. dhe H.D, me qëllim të përfitimi të dobisë pasurore në mënyrë të kundërligjshme për veten dhe grupin, në kohë të pa verifikuar kanë siguruar para të gatshme të falsifikuara, të prodhuara në Maqedoninë e Veriut, dhe atë gjithsej 42,505 copë të monedhave metalike me prerje 2 euro, në shumën totale 85 mijë euro.
Në kërkesë thuhet se të dyshuarit më pas ato monedha i kanë futur në thasë të ndryshëm najloni dhe bezi, duke i kamufluar që të duken si ngarkesa me mallra të zakonshme dhe i kanë vendosur në vetura, pastaj më 28 nëntor të këtij viti i kanë sjellë në Kosovë, ku në mënyrë të koordinuar ishin takuar në Han të Elezit me të pandehurit S.R, M.K, dhe H.D. për të vazhduar rrugën së bashku për në Prishtinë, ku sipas planit të përbashkët ishte paraparë që të bëhej shitblerja e parave të falsifikuara, përkatësisht pranim-dorëzimi i sasisë se parave të falsifikuara, me ç’rast zbulohen dhe identifikohen nga policia, e cila ndërhyn dhe i arreston të njëjtët në flagrancë, duke iu sekuestruar edhe sasinë e parave të falsifikuara.
Sipas kërkesës së PSRK-së të dyshuarit me këto veprime në bashkryerje kanë kryer veprën penale “Blerje, pranimi dhe fshehja e sendeve të përfituara me vepër penale, nga neni 333 (par. 1) lidhur me nenin 31 te Kodit nr. 06/L-074 Penal te Republikës si Kosovës (KPRK).
utje në kërkesën e prokurorisë thuhet se të dyshuarit B.A, Sh.A dhe A.A., më 28 nëntor të këtij viti ishin takuar në Han të Elezit me të pandehurit S.R, M.K. dhe H.D., duke e vendosur sasinë e parave në veturën VW” Passat” të cilën e ngiste H.D. për të vazhduar së bashku rrugën në Prishtinë për tu takuar në pompën e derivateve “ Shell” ku ishte paraparë të bëhej shitblerja e parave të falsifikuara, përkatësisht pranim- dorëzimi i sasisë së parave të falsifikuara me ç’rast zbulohen dhe identifikohen nga Policia e cila ndërhynë dhe i arreston të pandehurit në flagrancë si dhe e sekuestron sasinë e parave të falsifikuara.
Sipas kërkesës së prokurorisë, të dyshuarit e lartcekur me këto veprime kanë bashkëkryerë veprën penale “Falsifikim i parasë” nga nenin 296 ( par.1) lidhur me nenin 31 të KPRK-së.
Tutje, sipas kërkesës të pandehurit B.Sh. dhe A.A. ishin takuar në Han të Elezit me të dyshuarit tjerë S.R, M.K. dhe H.D, duke i futur para në veturë “Volkswagen” e të cilën e kishte vozitur i dyshuarit H.D e për të vijuar për në qytetin e Prishtinë.
“Pastaj të dyshuarit ishin drejtuar nga Prishtina për në rrugën e Gjilanit duke ndaluar në pompën e derivateve “Shell” për të bërë pranim dorëzimin e parave të falsifikuara kundrejt një çmimi në para të vërteta me që rast në atë moment kishte ndërhyrë policia duke i arrestuar të pandehurit dhe duke sekuestruar paratë e falsifikuara”, thuhet në kërkesën e Prokurorisë.
Me këtë veprime në bashkëkryerje ata dyshohen për veprën penale “Shpërlarje parash”.
