Prokuroria Themelore në Prizren ka ngritur aktakuzë ndaj të dyshuarit B.U., për vrasje në tentativë dhe armëmbajtje pa leje.
Siç ka njoftuar Prokuroria, i pandehuri gjendet në paraburgim që nga 15 korriku nën dyshimin se i ka kryer këto dy vepra penale.
“Sipas aktakuzës, i akuzuari B.U., me datë 17.05.2024, rreth orës 17:30, në fshatin Nashec të Komunës së Prizrenit, me dashje tenton ta privojë nga jeta personin tjetër, në atë mënyrë që pasi takohet me viktimën J.A., paraprakisht kërkon nga i njëjti t’ia japë një shumë parash prej 2 mijë e 500 eurosh në formë të borxhit dhe pasi viktima i thotë se nuk e posedon një shumë të tillë, i njëjti nxjerr pistoletën dhe nga dritarja e automjetit të markës ‘WV Passat CC’, e cila ka qenë e hapur, shkrep në drejtim të viktimës, me ç’rast e plagos në këmbën e tij të djathtë dhe largohet nga vendi i ngjarjes, si pasojë e lëndimeve të marra, viktima i nënshtrohet tretmanit mjekësor pranë repartit kirurgjik të Spitalit të Përgjithshëm të Prizrenit”, thuhet në njoftimin e Prokurorisë.
