UEFA mirëpret vendimin e FIFA-s për të tërhequr planin për të shitur një pjesë të aksioneve në garat e saj përfshirë Kupën e Botës te duart private.
“Propozimi u refuzua njëzëri nga shoqatat kombëtare të UEFA-s dhe nga shumë federata e konfederata të tjera të të gjitha madhësive në mbarë botën, detyra e të cilave është mbrojtja e futbollit. UEFA falënderon të gjithë tifozët, ligat, klubet, lojtarët, individët, shoqatat dhe konfederatat që kundërshtuan këtë skemë, së bashku me shumë kryeministra, krerë shtetesh dhe komentatorë që i kanë bërë të qartë presidentit të FIFA-s se futbolli nuk është në shitje”, njofton UEFA.
Sipas UEFA-s, nuk mund të vazhdohet kështu me skema të fshehta të përgatitura me afate të shpejta, nga individë pa emër dhe me përfitime të dyshimta për lojën. Duhet të identifikojmë përgjegjësit dhe t’i mbajmë ata përgjegjës.
“Është e drejtë që, në ditët dhe javët në vijim, UEFA të punojë me shoqatat e saj dhe në bashkëpunim të ngushtë me konfederatat e tjera për të reflektuar se si ndodhi kjo dhe për të hartuar një plan që të sigurojë se nuk do të përsëritet më. Ky rishikim duhet të jetë i plotë dhe themelor. Asnjë opsion nuk duhet të përjashtohet. Udhëheqja aktuale e FIFA-s nuk ka humbur vetëm besimin e UEFA-s, por edhe të shumë anëtarëve të tjerë të familjes së futbollit”, njofton UEFA.
Kur Gianni Infantino kërkoi besimin dhe votat e shoqatave anëtare të FIFA-s për t’u zgjedhur president në vitin 2016, ai tha: “Sigurisht që duhet të jemi transparentë. Unë kam qenë i tillë gjatë 15 viteve të fundit të jetës sime në UEFA. Ju do të duhet të luani një rol çdo ditë në jetën e FIFA-s”, përpara se t’u thoshte palëve të pranishme: “Paratë e FIFA-s janë paratë tuaja. Nuk janë paratë e presidentit të FIFA-s. Janë paratë tuaja. Ju jeni shoqatat kombëtare dhe paratë e FIFA-s duhet të shërbejnë për zhvillimin e futbollit dhe jo për asgjë tjetër”.
Për të dyja këto premtime, ai ka dështuar të përmbushë atë që tha. Marrëveshja e fshehtë, e paqartë dhe e përgatitur në prapaskenë, të cilën ai u përpoq ta impononte, ishte gjithçka tjetër përveçse transparente.
Dhe me rezerva që tejkalojnë 5 miliardë dollarë, ai gjithashtu ka dështuar t’i përdorë paratë e shoqatave në të mirë të lojës.
UEFA do të nisë menjëherë punën me partnerët dhe palët e interesuara në mbarë botën dhe në të gjitha nivelet e futbollit për të propozuar një mënyrë të re të shpërndarjes së burimeve përmes programit ekzistues FIFA Forward.
“Duhet të fillojmë të përdorim një pjesë të atyre parave që qëndrojnë të paprekura në llogaritë bankare të FIFA-s për të dhënë mbështetjen fillestare që futbolli bazë dhe loja në përgjithësi kanë nevojë në secilin prej 211 vendeve anëtare të FIFA-s. Por nuk kemi nevojë të shesim pasurinë e familjes për ta financuar këtë. Kjo është një fitore për të gjithë futbollin. Por kjo nuk duhet të jetë fundi i historisë. Propozimi është tërhequr. Detyra për të rikthyer besimin në FIFA sapo ka filluar”, njofton UEFA.
