Komuna e Prizrenit ka marrë vlerësim ndërkombëtar duke u shpallur “Qyteti Evropian i Sportit” për vitin 2026.
Lajmin e ka bërë të ditur kryetari i Komunës, Shaqir Totaj, përmes një postimi në rrjete sociale, duke e cilësuar këtë si një sukses të jashtëzakonshëm për qytetin dhe një dëshmi e angazhimit të vazhdueshëm për zhvillimin e sportit dhe përkrahjen e të rinjve.
“Me krenari ju njoftoj se Prizreni është shpallur Qyteti Evropian i Sportit për vitin 2026! Ky është një sukses i jashtëzakonshëm që e vlerëson angazhimin tonë për zhvillimin e sporteve dhe mbështetjen e të rinjve”, ka shkruar Totaj.
Sipas tij, ky vlerësim erdhi menjëherë pas vizitës së anëtarëve të Komitetit Evropian të Vlerësimit të ACES Europe, të cilët qëndruan në Prizren për të parë nga afër infrastrukturën sportive dhe për të vlerësuar kandidaturën e qytetit për këtë titull prestigjioz.
