Presidentja e Kosovës, Vjosa Osmani, përmes një postimi ka njoftuar se nesër shpallet ditë zie shtetërore pas tërmetit që ndodhi në Turqi e Siri.
Osmani ka thënë se ushtarakët e Kosovës tashmë gjenden në Turqi ndërkaq Kosova është në dispozicion të plotë të vazhdojë mbështetjen.
Tutje, presidentja tha se dhimbja e popullit turk dhe atij të Sirisë është edhe e jona. Prandaj, bazuar në kompetencat kushtetuese e ligjore, në shenjë respekti shtetëror e qytetar, ditën e mërkurë, 8 shkurt shpallet Ditë Zie Shtetërore në Republikën e Kosovës, pas tërmeteve të datës 6 shkurt 2023 me epiqendër në Turqi, i cili la mijëra të vdekur e të lënduar.
“Teksa kujtojmë viktimat, nderojmë trimërinë dhe qëndresën e atyre që po bëjnë të pamundurën për shpëtimin e çdo jete nën rrënoja.
Fuqia shkatërruese e këtij tërmeti ka tronditur zemrat e gjithsecilit, porse mbështetja ndaj njëri- tjetrit në këto ditë tmerri ngjallë shpresën dhe besimin se jeta do të triumfojë”, thuhet në postimin e Osmanit.
