Polonia do të ndalojë përdorimin e emrit zyrtar për enklavën ruse të Kaliningradit dhe do të kthehet në ekuivalentin e saj historik, njoftoi sot qeveria në Varshavë, duke shkaktuar zemërimin e Moskës.
Duke cituar një rekomandim nga një komision shtetëror i ngarkuar me standardizimin e emrave të huaj në gjuhën polake, ministri i zhvillimit të Polonisë, Waldemar Buda deklaroi se Kaliningradi tani zyrtarisht do të quhet Konigsberg (“Krolewiec” në polonisht).
“Ne nuk duam rusifikimin në Poloni dhe kjo është arsyeja pse ne kemi vendosur të ndryshojmë emrin në gjuhën tonë amtare të Kaliningradit dhe rajonit të Kaliningradit”, pohoi Buda.
Emri historik për enklavën në kufi me Poloninë dhe Lituaninë do të përdoret tani në dokumentet dhe hartat zyrtare, një veprim që shkaktoi zemërimin e Rusisë, raporton themoscowtimes.
I themeluar në vitin 1255 nga Urdhri Teutonik, qyteti u emërua për nder të mbretit bohem Ottokar II dhe njihej si Konigsberg – Krolewiec në polonisht, Karaliaucius në lituanisht dhe Korolevets në rusisht.
Në vitin 1946, ai u riemërua nga Bashkimi Sovjetik në Kaliningrad për të nderuar Kryetarin e Presidiumit të Sovjetit Suprem të BRSS, Mikhail Kalinin.
Vlerësohet se 25 mijë polakë, kryesisht oficerë të ushtrisë të konsideruar antikomunistë, u masakruan nga policia politike e Bashkimit Sovjetik në një pyll afër Smolenskut në vitin 1940 me urdhër të Josef Stalinit.
Bashkimi Sovjetik kishte mohuar prej kohësh përgjegjësinë për vrasjet, duke akuzuar nazistët për krimin, përpara se të pranonte të vërtetën në vitin 1990.
