Franca dhe Gjermania kanë paraqitur një plan të ri për afrimin e vendeve të Ballkanit Perëndimor dhe Moldavisë me Bashkimin Evropian, në përpjekje për të sjellë një “dinamikë të re” në procesin e zgjerimit të BE-së.
Sipas një dokumenti jozyrtar (non-paper), të parë nga Euractiv, nisma synon t’i përfshijë më shumë këto vende në funksionimin e përditshëm të BE-së, në varësi të përparimit të tyre në reformat e brendshme.
Me liderët e BE-së që pritet të mblidhen në Mal të Zi për një samit për zgjerimin të premten, nisma franko-gjermane synon të tregojë se Ballkani nuk po lihet pas.
“Duhet të ofrojmë stimuj shtesë si pjesë e një procesi gradual të bazuar në meritë dhe të thjeshtojmë procesin aktual për ta bërë më efikas dhe për të mundësuar integrim më të shpejtë dhe më të thellë”, thuhet në dokument.
Ideja e re është krijimi i “blloqeve ndërtuese” për vendet që janë në procesin e anëtarësimit në BE, për t’i përfshirë më shumë në fusha të ndryshme, në varësi të progresit të reformave të tyre. Kjo përfshirje, megjithatë, do të ishte e kthyeshme në rast të prapambetjes nga vlerat dhe parimet bazë të BE-së.
Në dokument thuhet se Komisioni Evropian duhet të paraqesë propozime për të lehtësuar integrimin gradual të vendeve kandidate në rrugën e tyre drejt anëtarësimit.
Në propozim parashihet që përfaqësuesit e Ballkanit Perëndimor dhe Moldavisë të marrin pjesë në takime të përbashkëta me komisionerë dhe eurodeputetë dy herë në vit, si dhe në takime joformale të Këshillit dhe Këshillit Evropian pa të drejtë vote.
Po ashtu parashihet bashkëpunim i zgjeruar në fushën e sigurisë dhe mbrojtjes, si dhe përfshirje në programe të BE-së si Erasmus+, Creative Europe dhe Horizon Europe, si dhe integrim më i thellë në tregun e brendshëm të BE-së. / Burimi: Euractiv
