Sot pasdite do të arrijë për një vizitë në Kosovë, presidenti slloven Borut Pahor.
Ai pritet të takohet me presidenten e Kosovës, Vjosa Osmani dhe kryeministrin, Albin Kurti, raporton KosovaNews.
Turneu i presidentit të Sllovenisë vjen në kuadër të përgatitjeve për Samitin e 11-të të procesit Brdo-Brioni, më 12 shtator, në Brdo pranë Kranjës.
Presidenti i Sllovenisë, Borut Pahor, po zhvillon një turne të vizitave nëpër vendet e Ballkanit Perëndimor.
Ai para tri ditësh qëndroi në Beograd, kurse sot (e mërkurë), Pahor do të vijë për vizitë në Kosovë.
Kujtojmë se jo më larg se dje Sllovenia ia tërhoqi vërejtjen Serbisë pas deklaratës së Vuçiqit lidhur me Kosovën.
Në fakt, Ministria e Punëve të Jashtme e Sllovenisë ka ftuar ambasadorin e Serbisë në Lubjanë për intervistë, si protestë për deklaratën që dha presidenti serb Aleksandar Vuçiq, para pak ditësh në një konferencë në Beograd pas takimit me presidentin slloven Borut Pahor.
Vuçiqi gjatë konferencës pyeti gazetarët se si t’ia shpjegojë kombit të tij se Serbia po i vë sanksione Rusisë, e jo Sllovenisë.
E sipas Vuçiqit, Rusia nuk ka shkelur integritetin e Serbisë dhe të drejtën ndërkombëtare, meqë nuk e ka njohur pavarësinë e Kosovës, ndërkohë që Sllovenia e ka bërë këtë.
Ministria e Punëve të Jashtme të Sllovenisë ia ka shprehur shqetësimin ambasadorit serb në Lubjanë, Zoran Vlatkoviq, lidhur me deklaratën e Vuçiqit dhe ka shprehur pritshmërinë që Beogradi zyrtar të mos problematizojë qëndrimin e Sllovenisë ndaj Kosovës.
“Ne informuam palën serbe se jemi shumë të befasuar nga deklaratat e presidentit Vuçiq. Edhe një herë përcollëm qëndrimin tonë për Kosovën, të cilën Sllovenia e njohu si shtet të pavarur. Në këtë drejtim, ne shprehëm pritjen që Serbia të mos e problematizojë qëndrimin tonë në lidhje me Kosovën në të ardhmen, sepse mbështetja e Sllovenisë për Kosovën nuk është e drejtuar kundër Serbisë. Ne gjithashtu shprehëm kundërshtimin tonë të fortë për barazimin e njohjes sllovene të Kosovës me agresionin rus kundër Ukrainës”, thuhet në njoftimin e Ministrisë së Punëve të Jashtme të Sllovenisë.
Serbia është ndër vendet e pakta në Evropë që ka refuzuar t’i vë sanksione Rusisë për agresionin në Rusi, me gjithë thirrjet e vazhdueshme të BE-së e SHBA-së.
