Me qëllim të rritjes së sigurisë në trafik dhe parandalimit të aksidenteve rrugore, Drejtoria Rajonale e Policisë në Mitrovicën e Jugut ka intensifikuar aktivitetet dhe kontrollet ndaj pjesëmarrësve në trafik, me fokus të veçantë te drejtuesit e motoçikletave.
Gjatë dy javëve të fundit, njësitet policore kanë realizuar kontrolle të shtuara në zona të ndryshme të rajonit, ku janë evidentuar 155 kundërvajtje në trafik nga drejtuesit e motoçikletave.
Nga këto raste, 27 motoçikleta janë sekuestruar përkohësisht, deri në përfundimin e procedurave ligjore, pasi janë hasur pa dokumentacionin e nevojshëm, pa regjistrim të vlefshëm ose pa pajisjet e domosdoshme të sigurisë.
Ndaj drejtuesve të këtyre mjeteve janë ndërmarrë veprimet përkatëse ligjore, përfshirë shqiptimin e gjobave dhe masave të tjera në përputhje me shkeljet e konstatuara.
Policia ka apeluar te të gjithë drejtuesit e motoçikletave që para daljes në trafik të sigurohen se posedojnë dokumentacionin e nevojshëm, se mjetet e tyre janë të regjistruara dhe teknikisht të rregullta, si dhe të përdorin pajisjet mbrojtëse, veçanërisht helmetën.
Sipas Policisë, kontrollet do të vazhdojnë edhe në ditët në vijim me qëllim të parandalimit të aksidenteve dhe rritjes së sigurisë për të gjithë pjesëmarrësit në trafik.
