Policia e Kosovës ka njoftuar se ka shqiptuar gjoba ndaj subjekteve juridike në qytetin e Mitrovicës për zhurmën e shkaktuar në publik.
Përpos punës dhe angazhimeve të vazhdueshme në parandalimin e veprave penale, policia në Mitrovicë njofton se po angazhohet ne baza ditore edhe për ruajtjen e rendit dhe qetësisë publike.
Gjatë ditëve të fundit qytetarët në Mitrovicë janë ballafaquar me problemin e zhurmës, pasi që lokale të ndryshme të gastronomisë në Mitrovicë kanë shkaktuar zhurmë të bezdisshme (muzikë me ton te lartë).
Policia njofton se ka marrë masa të menjëhershme dhe gjatë kësaj jave ka shqiptuar gjoba ndaj tetë pronarëve apo personave përgjegjës të lokaleve të gastronomisë apo subjekteve juridike.
“Gjobat janë shqiptuar në bazë të autorizimeve dhe kompetencave policore dhe duke u bazuar në dispozitat e Ligjit për Rendin dhe Qetësinë Publike”, thuhet në njoftim.
Masa të tilla Policia njofton se do të vazhdojnë të merren edhe në ditët në vijim në mënyrë që të parandalohet bezdisja nga zhurma dhe shqetësimi i qytetarëve dhe do shqiptohen gjoba ndaj të gjithë personave dhe subjekteve juridike pa përjashtim./KosovaNews/
