Policia e Kosovës njofton se gjatë vazhdimit të zbatimit të planit operativ “Goditja”, javën e fundit në Mitrovicë u arrestuan 15 persona (13 prej tyre të kërkuar me urdhëresa nga Gjykatat) dhe janë konfiskuar 24 armë të ftohta (thika, shufra metalike, boks hekuri, e të tjera).
Në njoftimin e Policisë, thuhet se plani operativ “Goditja” edhe javën që kemi lënë pas vazhdoi me numër të shtuar të patrullimeve, kontrolleve në bare nate, kafiteri e lokacione të ndryshme që frekuentohen nga qytetarët.
“Në saje të këtyre angazhimeve në teren, në javën e fundit, nga data 21.08.2023 deri me datën 27.08.2023 janë realizuar këto aktivitete: Janë realizuar 302 patrullime policore, janë realizuar 282 pika kontrolli të automjeteve, janë kontrolluar 1998 vetura, janë legjitimuar 2395 persona, janë realizuar 58 pika kontrolli me radar dhe alkootest, janë kontrolluar 2 lokale të ndryshme, janë konfiskuar 4 armë zjarri të ndryshme, janë konfiskuar 24 armë të ftohta ( thika, shufra metalike, boks hekuri etj.), janë arrestuar 2 persona, janë arrestuar 13 persona te kërkuar me urdhëresa nga gjykatat”, thuhet në njoftim.
Bëhet e ditur se angazhimet në realizimin detyrave operative do të vazhdojnë edhe ditëve në vijim.
