Policia e Kosovës njofton se pesë raste të dhunës në familje janë raportuar gjatë 24 orëve të fundit në Kosovë.
Sipas raportit 24-orësh të PK-së, rastet janë shënuar në Prishtinë, Çagllavicë, Pejë, Gjakovë dhe Mitrovicë e Jugut, raporton “Betimi për Drejtësi”.
Në Prishtinë një grua kosovare ka raportuar për një mosmarrëveshje me një burrë, i cili dyshohet se i ka shkaktuar dhunë psikike. “Palët janë intervistuar dhe me vendim të prokurorit rasti inicohet si më lartë dhe i dyshuari është liruar në procedurë të rregullt”, thuhet në raport.
Edhe në Çagllavicë një grua ka raportuar se është sulmuar psiqikisht dhe fizikisht nga një burrë, për lidhjen e të cilëve nuk jepen detaje.
“Ankuesja femër kosovare ka raportuar se i dyshuari mashkull kosovar e kishte sulmuar psiqikisht dhe fizikisht dhe i njëjti e kishte kanosur me fjalë të ndryshme. I dyshuari është arrestuar dhe pas intervistimit me vendim të prokurorit është dërguar në mbajtje”, thuhet në raportin e policisë.
Po ashtu, në Pejë është raportuar për dhunë psiqike ndaj një gruaje, nga një burrë.
“Raportohet se është arrestuar një i dyshuar mashkull kosovar pasi që i njëjti dyshohet se ka shkaktuar dhunë psiqike ndaj viktimës femër kosovare. Me urdhër verbal nga gjyqtari i procedurës paraprake janë kontrolluar dy shtëpi që ndërlidhën me rastin, mirëpo nuk është gjetur asgjë e dyshuar. Me vendim të prokurorit rasti inicohet si më lartë dhe i dyshuari është liruar në procedurë të rregullt”, ka njoftuar policia.
Kurse, rasti tjetër është raportuar në Mitrovicë të Jugut.
“Ankuesja femër kosovare ka raportuar se pas një mosmarrëveshje është sulmuar fizikisht nga i dyshuari mashkull kosovar. Lidhur me rastin i dyshuari është arrestuar dhe pas intervistimit me vendim të prokurorit është liruar në procedurë të rregullt”, thuhet në raport.
Ndërkaq, dy gra në Gjakovë kanë raportuar në polici se janë sulmuar fizikisht nga një burrë pas një mosmarrëveshjeje.
“I dyshuari mashkull kosovar pas një mosmarrëveshje kishte sulmuar fizikisht dy viktimat femra kosovare, të cilat kanë pranuar tretman mjekësor, ndërsa i dyshuari është larguar në drejtim të panjohur. Rasti nën hetime”, thuhet në raporti. /BetimipërDrejtësi
